जागतिक पर्यावरण दिन २०२६ : घोषणांपासून कृतीकडे
हवामानासाठी आता आणि आत्ताच! जागतिक पर्यावरण दिन २०२६ : घोषणांपासून कृतीकडे लेखक : प्रा. अजय बी. कोंगे विभाग प्रमुख, कौशल्य विकास आणि उद्योजकता विभाग, डिपार्टमेंट ऑफ शॉर्ट टर्म कोर्सेस, संजय घोडावत इन्स्टिट्यूट, अतिग्रे, कोल्हापूर “पृथ्वी आपल्याला आपल्या पूर्वजांकडून वारसा म्हणून मिळालेली नाही; ती आपण आपल्या पुढील पिढ्यांकडून उसनी घेतलेली आहे.” हे वाक्य आजच्या काळात पूर्वीपेक्षा अधिक समर्पक वाटते. कारण मानवजातीसमोर उभे राहिलेले सर्वात मोठे आव्हान म्हणजे हवामान बदल. जागतिक पर्यावरण दिन २०२६ ची अधिकृत थीम “हवामान कृती” (Climate Action) आणि मुख्य संदेश “आता हवामानासाठी” (#NowForClimate) हा केवळ एक घोषवाक्य नसून, तो संपूर्ण मानवजातीला दिलेला धोक्याचा इशारा आणि कृतीचा संदेश आहे. आज पृथ्वीचे तापमान सातत्याने वाढत आहे. अनियमित पाऊस, अतिवृष्टी, दुष्काळ, जंगलातील वणवे, हिमनद्या वितळणे, समुद्रपातळीत होणारी वाढ, जैवविविधतेचा ऱ्हास आणि वाढते प्लास्टिक प्रदूषण यामुळे मानवाच्या अस्तित्वालाच आव्हान निर्माण झाले आहे. विज्ञानाने धोक्याची घंटा वाजवली आहे; आता निर्णय घेण्याच...